Столтенберг: Одбраната, Украина и глобалните партнерства во фокусот на самитот на НАТО во Вашингтон

ЖЕНЕВА (АА) – Земјите членки на Северноатлантската алијанса (НАТО) на претстојниот самит во Вашингтон во јули ќе се фокусираат на три точки од агендата, кои вклучуваат одбрана и одвраќање, поддршка за Украина и глобални партнерства, изјави генералниот секретар на НАТО, Јенс Столтенберг, пренесува Анадолу.

„Првата тема на самитот ќе биде одбраната и одвраќањето, а сојузниците мора да ги исполнат одбранбените планови со силите, способностите и подготвеноста, како и да покажат споделување на товарот кога станува збор за трошоците за одбрана“, рече Столтенберг на седницата на Парламентарното собрание на НАТО во Софија.

Столтенберг истакна дека е „оптимист“ за поделбата на товарот и способноста на сојузниците да покажат дека НАТО се засилува кога станува збор за одбраната и одвраќањето и за инвестициите во одбраната.

„Ќе имаме најмалку две третини од сојузниците кои трошат два отсто од БДП за одбрана до самитот во Вашингтон“, рече Столтенберг, истакнувајќи дека сѐ уште не може да ги даде конечните бројки.

Тој додаде дека обезбедувањето постабилен проток на залихи и долгорочна финансиска посветеност кон Украина е другата главна тема на самитот.

„Очекувам дека до самитот во Вашингтон ќе се договориме за посилна улога на НАТО во организирањето, обезбедувањето, планирањето, испораката на залихи за да обезбедиме постабилен проток на снабдување во Украина. Но, за да го направиме ова навистина ефективно, не ни треба само подобра организација која обезбедува поголема отчетност, транспарентност, предвидливост и испорака на залихи, туку ќе ни треба и долгорочна финансиска посветеност“, истакна шефот на НАТО.

Тема на самитот ќе бидат и глобалните партнерства, особено со Австралија, Нов Зеланд, Јапонија и Јужна Кореја.

Нагласувајќи дека безбедноста „не е регионална, туку глобална“, Столтенберг рече дека на самитот во Вашингтон се поканети партнери од Азиско-Пацифичкиот Регион.

„Споделуваме исти вредности. Веруваме во демократски отворени општества. Но, исто така, силно веруваме во потребата заедно да ги поддржиме овие вредности“, нагласи Столтенберг.

Самитот на НАТО ќе се одржи во Вашингтон од 9 до 11 јули.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.