Столтенберг рече дека е „исклучително важно“ рускиот претседател Владимир Путин да не победи во оваа војна, оценувајќи дека руската победа ќе го направи светот поопасен
Генералниот секретар на НАТО Јенс Столтенберг побара од Јужна Кореја да ја засили воената помош за Украина, советувајќи го Сеул да ја укине забраната за испраќање оружје на земјите во војна.
„Ако веруваме во слободата, во демократијата, ако не сакаме да надвладеат автократијата и тоталитаризмот, тогаш им треба оружје“,
рече Столтенберг во Институтот Шај во Сеул, повикувајќи ја Јужна Кореја да направи повеќе за да го поддржи Киев.
Вчера Столтенберг се сретна со високи јужнокорејски претставници, вклучително и министерката за надворешни работи Парк Џин, како дел од турнејата чија цел е зајакнување на врските на НАТО со сојузниците во Азија.
Јужна Кореја е сè поважен извозник на оружје во светот и неодамна потпиша договори за продажба на стотици тенкови на европските земји, вклучително и на Полска, која е членка на НАТО.
Сепак, нејзините закони забрануваат продажба на оружје на земјите во војна, што ja отежнува испораката за Украина, на која Сеул сепак и испрати воени средства и хуманитарна помош.
Столтенберг посочи дека на Киев итно му треба повеќе оружје. Тој посочи дека земјите како Германија и Норвешка, кои имаат слични закони со Јужна Кореја во однос на извозот на оружје, го промениле за да го поддржат Киев.
Јужна Кореја минатата година ја отвори својата прва дипломатска мисија во НАТО.
Столтенберг рече дека е „исклучително важно“ рускиот претседател Владимир Путин да не победи во оваа војна, оценувајќи дека руската победа ќе го направи светот поопасен.
Тој посочи дека НАТО не ја смета Кина за „противник“ и дека Алијансата верува во заеднички ангажман за прашања кои се движат од контрола на вооружувањето до климатски промени.
Столтенберг е во посета на Сеул, на турнеја во која ќе биде вклучена и Јапонија и има за цел да ги зајакне врските со сојузниците од НАТО кои се соочуваат со војната во Украина.
Извор: 360stepeni.mk
