По шест години, конечно ја враќаме обврската на Собранието за објавување на Програма за одбележување јубилејни годишнини на значајни настани и истакнати личности за 2025 година на Р. Македонија со што се грижиме за одржување на државната меморија, односно на меморијата на сите личности и историски настани кои придонеле за градењето на македонската држава, посочи Велика Стојковска Серафимовска, пратеник од пратеничката група на ВМРО-ДПМНЕ и коалицијата „Твоја Македонија“.
-Ве информирам дека согласно своите надлежности, оваа Програма со која се утврдуваат значајните настани и истакнати личности кои ќе се одбележат во 2025 година, ја изготви работното тело кое произлезе од собраниската Комисија за култура и туризам, а во кое членуваа претставници од скоро сите политички партии во македонското собрание.
При подготвувањето на Програмата, Комисијата за култура и туризам оствари контакт со националните институти, државни универзитети, национални установи, центри за култура, заводи за заштита и музеи, библиотеки и останати здруженија, сојузи и невладини организации во државата кои се бават со дејност од областа на културата. Исто така, беа испратени дописи и до сите општини, вклучувајќи го и Град Скопје како посебна едница на локалната самоуправа, рече таа.
Стојковска Серафимовска посочи дека оваа Програма е составена од 103 јубилејни годишнини на значајни настани и истакнати личности кои го одразуваат мултиетничкиот карактер на Републиката, и кои се вградени во историскиот развој на земјата и со своето дело ги афирмирале начелата на хуманизмот и општо цивилизациските вредности.
-Напоменуваме дека претходната влада, предводена од СДСМ/ДУИ, со необјавувањето на ваква Програма остави шестгодишна празнина во државната меморија, а само за потсетување, во изминатите години се одбележаа неколку исклучително важни годишни како 120 години од Илинденското востание, 150 години од раѓањето на Гоце Делчев, 30 години самостојност на Р. Македонија и многу други значајни јубилејни годишни кои го одбележуваат градењето на државноста. Но оваа година, со промената на власта, парламентарното мнозинство во предводено од ВМРО ДПМНЕ, ја враќа одговорноста на Собранието кон нашите обврски и вредности за почит кон Македонија. Со објавувањето на Програмата во единствениот официјален државен гласник „Службен весник“, идните генерации ќе можат да го следат општествениот и историски процес на создавањето и градењето на македонската држава, рече пратеничката.
ИЗВОР: kurir.mk
