Пратеничката група на ВМРО-ДПМНЕ и коалицијата минатата недела поднесе Предлог-закон за изменување на Законот за постапување со бесправно изградени објекти по скратена постапка, со кој се предлага продолжување на рокот на важност на законот за уште пет години, односно до 3 март 2031 година.
Како што изјави пратеникот Бојан Стојаноски, целта на предложените измени е да се овозможи граѓаните да не останат со нерешен статус на своите домови поради административни пречки или бавни процедури.
„Многу наши сограѓани со години се заглавени во судски спорови за имотно-правни односи и различни постапки кои не се по нивна вина. Доколку рокот истечеше на 3 март 2026 година, илјадници предмети ќе беа прекинати по сила на закон во фазата во која се наоѓаат“, истакна Стојаноски.
Со предложените измени, наместо досегашните 15 години, законот ќе важи вкупно 20 години. Според предлагачите, ова ќе обезбеди правна сигурност за општините како надлежни органи, со цел да можат легално да ги завршат сите веќе започнати постапки.
Од ВМРО-ДПМНЕ нагласуваат дека измените не предвидуваат поднесување нови барања, туку се однесуваат исклучиво на граѓаните кои веќе имаат поднесено документација и со години чекаат на решавање на својот предмет и добивање имотен лист.
Стојаноски посочи дека иницијативата доаѓа како директен одговор на барањата на Управниот одбор на ЗЕЛС и на општините, кои, како што рече, секојдневно се соочуваат со конкретни проблеми во спроведувањето на постапките.
Според него, предложеното законско решение нема да предизвика дополнителни финансиски импликации врз државниот Буџет и ќе стапи на сила веднаш по објавувањето во „Службен весник“, со цел да се избегне правен вакуум.
Од пратеничката група порачуваат дека со оваа измена се помага на илјадници семејства конечно да го обезбедат својот дом и да се гарантира стабилност и конзистентност во правниот систем.
Извор: kurir.mk
