Разговараме по точката за разрешување на заменици министри кои како и се до сега никој ниту знае како изгледаат, ниту па по 13 месеци од Владата некој може да каже зошто овој народ ги плаќал овие луѓе, изјави пратеникот од редовите на ВМРО-ДПМНЕ Бојан Стојаноски на денешната собраниска седница.
„Прво самото читање на книга од страна на премиерот во Собранието додека говорат пратениците покажува на неговата одвратна непочит кон институцијата Собрание и спрема институцијата пратеник. Навистина не знам што е следно од човек кој чита книга додека пратениците говорат, додека навредува, додека шета низ салата и додека брутално навредува пратеничка оценувајќи го нејзиниот физички изглед“, рече Стојаноски.
Тој додаде дека срамота е кога се лаже и кога во лагите свесно го вплеткувате вашето семејство.
„Тоа што некој го спомнува одреден член на вашето семејство кој во случајот е ваша сопруга за одредени вложувања требало да размислувате пред да ги давате тие изјави дека некој сам влегол во бизнисот и сам вложил средства, а за тоа дека некој ви нарачувал видеа на Тик-Ток во 2022-та година во Јули месец е таква нецивилирана и некултурна изјава што е навистина дно да се коментира“, вели Стојаноски.
Стојаноски посочи една работа, а тоа е човекот што го набедувате дека ги нарачал тие снимања треба Ковачевски да го праша Олвиер Спасовски зошто под посебна оперативна кампања полицијата и единицата „Алфи“ го набљудувало неговото семејство и неговите малолетни деца, а потоа да разговарате за тоа кој нарачувал и кој конструирал видеа на Тик-Ток за нечиј малолетни деца.
„Најголема лага во вчерашното ваше експозе беше тоа дека вие не разрешувате од политички причини. Вчера вашите колеги за да му купат време на Али Ахмети да дојде во 21 часот во Собранието се јавува по 8 – 9 реплики кон пратеник, а денеска ги нема заради тоа што стопанот денеска не треба да дојде во Собрание, вашиот премиер и газда нема обврска да дојде во Собрание и затоа вас ве нема и ќутите“, потенцираше Стојаноски.
Тој е дециден дека пратениците од власта излегуваат за реплика само кога ќе им дадат насока на копче.
„Во текот на вчерашниот ден докажавте дека од онаа СДСМ која ја знаеа граѓаните во 90-тите или во раните 2000-ти останала партија која е само слеп послушник на газдата од Зајас, на стопанот од Зајас и тајкунот од Чаир. Чекате и седите какви насоки ќе ви дадат тие“, изјави Стојаноски.
ИЗВОР: kurir.mk
