Ученикот од Нови Сад посочил дека препораката на луѓето од СНС била прво да се оди кај постарите бидејќи „тие секако гласаат за СНС“. Тој објаснил што очекувала партијата од нив
Средношколец од Нови Сад во изјава за Н1 Србија тврди дека Српската напредна партија (СНС), на чие чело е српскиот претседател Александар Вучиќ, на учениците им дава од 40 до 60 евра доколку обезбедат гласови за неа.
Така, за секој сигурен глас им била ветена споменатата сума пари. Тинејџерот објаснил како функционира тоа и рекол дека веќе еден месец во џеб му стојат три ливчиња со по 20 гласа.
„Ми ветија 40 евра по глас затоа што листот го добив од пријател, а него му ветиле 60 евра. Не сакав да собирам гласови… Немам време и не сакам да се занимавам со такви работи. Иако парите се добри, мислам дека не е во ред. Ова не е ништо ново и се случуваше и претходните години. За жал, се повторува“,
изјавил средношколецот М.Д. за Н1.
Ученикот од Нови Сад посочил дека препораката на луѓето од СНС била прво да се оди кај постарите бидејќи „тие секако гласаат за СНС“. Тој објаснил што очекувала партијата од нив.
„Еден од моите пријатели доби 20 листа, тоа го прави веќе втора година. Лани доби пари, но некој не добива. Ако се согласиме на тоа, наша обврска е да ги однесеме овие луѓе со автомобил до гласачкото место, да чекаме да гласаат и да се увериме дека сигурно гласале. На крајот од гласањето да ги добиеме парите, но еве… Некој лани не ги доби парите“,
вели М.Д.
Мислам дека вакво нешто е навистина страшно, парите се добри, но сепак не можам да разберам зошто некои мои пријатели се согласуваат да го направат тоа, додал средношколецот.
„Јас сум против СНС, но сè уште не сум нашол политичка опција чија идеологија ми се допаѓа. Иако сум полнолетен, нема да гласам на следните избори“,
изјавил тој за Н1.
Тинејџерот на новинарите на Н1 Србија им покажал празни ливчиња на СНС со редни броеви кои треба да се пополнат со сигурни гласови. Тој можел да заработи 800 евра по ливче, а неговиот пријател кој му ги дал ливчињата можел да заработи дури 1 200 евра.
Извор: 360stepeni.mk
