Трагедија го одбележа дочекот на Новата година во швајцарското скијалиште Кранс-Монтана, каде во барот „Le Constellation“ избувна смртоносен пожар. Според швајцарските власти, најверојатна причина за огнената стихија биле прскалки прицврстени на шишиња шампањ, кои го запалиле таванот обложен со акустична пена, објави Си-Ен-Ен.
Меѓу оние што очајно ги бараат своите најблиски е и Летиција Бродар-Ситр, чиј син Артур исчезнал во пожарот. Тој ѝ испратил порака веднаш по полноќ – „Среќна Нова година, мамо, те сакам“ – по што му се губи секаква трага.
Артур во барот требало да го прослави својот 17-ти роденден. Како што раскажа неговата мајка за Ројтерс, неколку дена однапред резервирал голема маса со пријателите и планирал новогодишната ноќ да ја помине токму во „Le Constellation“.
Таа не успеала да го пронајде во болницата во Сион, а поради тешките изгореници, голем дел од жртвите сè уште не се идентификувани. Дала ДНК примерок, надевајќи се дека ќе го пронајде синот. „Не спијам. Единствената утеха ми е што сум тука, блиску, и штом го пронајдам, ќе бидам покрај него“, изјави таа.
За весникот Le Temps таа изјави дека се вратила во Лозана за да провери дали Артур е хоспитализиран таму, додека неговиот татко го сторил истото во Берн, но без успех.
„Живеам вистински кошмар. Или ќе го најдам во мртовечница или во критична состојба. Ова е страшно“, изјави мајката, додавајќи дека неколку од пријателите на Артур се пронајдени со изгореници на речиси половина од телото.
„Немам зборови, тие поминале низ пекол“, рече таа.
Во очаен апел за помош, на Фејсбук објавила и фотографија од Артур со порака: „Мојот син Артур Бродар, роден на 22 февруари 2009 година, е една од жртвите на пожарот во Кранс-Монтана. Не знаеме дали е жив и каде се наоѓа. Доколку имате каква било информација за тоа во која болница е, ве молам контактирајте ме.“
Фотографиите од местото на настанот прикажуваат најмалку шест запалени прскалки во воздухот во преполн бар, непосредно пред избувнувањето на пожарот. Околностите потсетуваат на низа слични трагедии ширум светот, предизвикани од употреба на пиротехника во затворени простории.
Поранешниот комесар на полицијата во Бостон, Ед Дејвис, повлече паралела со пожарот во ноќниот клуб „The Station“ во Род Ајленд во 2003 година, кога загинаа 100 лица откако пиротехниката ја запали акустичната пена на таванот. „Пожарот се прошири неверојатно брзо поради тој изолациски материјал, луѓето едноставно немаа време да избегаат. Повеќето починаа од вдишување чад. Сцената беше ужасна“, изјави Дејвис за Си-Ен-Ен.
Слична трагедија се случи и за време на дочекот на Новата 2001 година во кафуле во Холандија, каде загинаа 10 млади лица откако прскалки запалија лесно запаливи украси. Во март минатата година, пожар зафати ноќен клуб во Северна Македонија, откако искри од пиротехника го запалија покривот, при што загинаа најмалку 63 лица. Во 2013 година, во Бразил, во слични околности, пожар поврзан со пиротехника усмрти повеќе од 230 луѓе во преполн ноќен клуб.
Извор: tv21
