АНКАРА (АА) – Американскиот претседател Џо Бајден и неговиот кинески колега Си Ѓинпинг ќе остварат средба следната недела, објави денес Белата куќа, јавува Анадолу.
Портпаролката Карин Жан-Пјер соопшти дека средбата ќе се одржи на 15 ноември во Сан Франциско, Соединетите Американски Држави.
„Двајцата лидери ќе разговараат за прашањата поврзани со билатералните односи САД – НР Кина (Народна Република Кина), за континуираното значење на одржување отворени линии на комуникација, како и за низа регионални и глобални прашања“, истакна таа.
Си Ѓинпинг ќе престојува во посета на САД од 14 до 17 ноември за да присуствува на 30. Самит за Азиско-пацифичката економска соработка.
„Надоврзувајќи се на нивната последна средба во ноември 2022 година на Бали, Индонезија, двајцата лидери ќе разговараат и за тоа како Соединетите Американски Држави и НР Кина да продолжат одговорно да менаџираат со конкуренцијата и да работат заедно онаму каде што се усогласуваат нашите интереси, а особено во транснационалните предизвици кои влијаат на меѓународната заедница“, нагласи Жан-Пјер.
