Директорот на Фондот за пензиското и инвалидското осигурување на Северна Македонија, Никола Мемов денеска имал средба со претставници на мисијата на Меѓународниот монетарен фонд во земјава, предводена од шефот на мисијата Анет Кјобе.
Мемов нагласил дека Фондот минатата година ја завршил согласно предвидените параметри, а пензиите се редовно исплаќани. Тој додал дека се прибрани повеќе средства по сите основи, а буџетскиот дефицит изнесувал 36.7 проценти и е помал, споредено со претходните години.
„Претставниците на ММФ се интересираа дали во проекциите на буџетот за оваа година се предвидени доволно пари за исплата на зголемените пензии и предвиденото усогласување или тоа ќе се направи со ребалансот на буџетот во јуни. Директорот на Фондот, Мемов кажа дека зголемувањето на пензиите од 2500 денари во март, како и усогласувањето во септември кое се очекува да биде помеѓу три и четири проценти, се предвидени во буџетот на Фондот за 2025 година“, се наведува во соопштението од Фондот.
Шефот на Мисијата, Анет Кјобе нагласил дека разговорите во Фондот се исклучително плодни и ќе придонесат во нивните размисли за идните предлози за подобрување на ситуацијата со пензискиот систем.
Во однос на тоа дали треба или не да има промени во пензискиот систем, директорот Мемов посочиле дека Фондот ги применува политиките на Владата, а идеите за подобрување треба да произлезат со дискусија на сите засегнати страни. Мемов нагласил дека ММФ со своето искуство може да придонесе во подобрувањето и консолидацијата на буџетот со нивни предлози, кои не мора да се однесуваат само на зголемување на старосната граница и на стапката на придонеси.
„Членовите на Мисијата исто така рекоа дека во рамките на оваа посета ќе имаат презентација за состојбата во пензискиот систем, со точна проекција на трошоците и со сугестии каде и како може да се направат заштеди, како и компаративна анализа со земјите од регионот“, се вели во соопштението и се додава дека двете страни на крајот изразија задоволството од остварената средба и надеж дека идната соработка ќе биде на обострано задоволство.
ИЗВОР: racin.mk
