Според Абас, се случува тешко злосторство против Палестинците – за 24 часа има повеќе од 240 загинати, се погребуваат во масовни гробници

Палестинскиот претседател Махмуд Абас ја нарече војната тешко злосторство против неговиот народ. Говорејќи во Рамала за египетски ТВ-канал во неговото прво интервју од почетокот на војната, рече дека територијата станала непрепознатлива и предупреди дека окупираниот Западен Брег може да експлодира во секое време

Израелската армија со несмалена жестокост продолжува со нападите во Појасот Газа, а Министерството за здравство на Хамас соопшти дека во последните 24 часа загинале повеќе од 240 луѓе, а најмалку 382 се ранети, пренесува Би-би-си.

Додека палестинските цивили се погребуваат во масовни гробници, Израел вели дека војната може да трае со месеци засилувајќи ја својата офанзива во централниот дел на Појасот Газа.

Претставничката на Обединетите нации (ОН), Џема Конел, ги нарече сцените што ги видела во болницата „Ал Акса“ во центарот на Газа целосен масакр.

Има многу жртви со екстремно тешки рани, кои не можат да се лекуваат бидејќи има толку многу луѓе пред нив на ред за операција и болницата е апсолутно преоптоварена,

рече Конел од Канцеларијата на ОН за координација на хуманитарни прашања.

Палестинските власти ги повикуваат ОН да прогласат целосен глад во целиот Појас Газа.

Палестинскиот претседател Махмуд Абас ја нарече војната тешко злосторство против неговиот народ.

Говорејќи во Рамала за египетски ТВ канал во неговото прво интервју од почетокот на војната, тој рече дека територијата станала непрепознатлива и предупреди дека окупираниот Западен Брег може да експлодира во секое време.

Палестинскиот лидер го обвини Вашингтон дека ја продолжува војната ставајќи вето на нацрт-резолуциите на ОН кои повикуваат на прекин на огнот.

Министерството за здравство во Газа, управувано од Хамас, соопшти дека речиси 21 000 Палестинци се убиени во израелските напади од почетокот на конфликтот, додека повеќе од 54 000 жители се ранети.

Израелскиот премиер Бенјамин Нетанјаху пред неколку дена повтори дека израелската армија ќе продолжи со полна сила до крај додека не се постигнат сите израелски цели, а тоа се уништување на палестинските екстремистички групи и ослободување на сите заложници киднапирани од Хамас за време на нападот на 7 октомври врз јужен Израел., што беше причина израелските сили да започнат со одмазда во Појасот Газа.

Израелските и арапските медиуми веќе неколку дена повторуваат дека Египет предложил план за прекин на огнот.

Според извештаите, планот ќе предвидува постепено ослободување на сите израелски заложници и неодреден број палестински затвореници кои се држат во израелските затвори, што ќе заврши со прекин на израелската офанзива.

При претходниот договор за привремено примирје што го преговараше Катар десетици заложници беа ослободени од Газа во замена за палестински затвореници.

Досега и Израел и Хамас се спротивставија на повиците за траен прекин на огнот.

Војната започна на 7 октомври откако Хамас го предводеше бранот смртоносни напади врз заедниците во Израел. Загинаа околу 1.200 луѓе, главно цивили. Околу 240 луѓе беа вратени во Газа како заложници, а голем број од нив подоцна беа ослободени.