Утрото ќе го означи почетокот на дводневниот самит на НАТО во Хаг, каде што лидерите на Алијансата – меѓу нив и американскиот претседател Доналд Трамп – ќе расправаат за зголемување на трошоците за одбраната и зајакнување на безбедноста на земјите-членки. Сепак, вниманието дома останува вперено кон Софија, од каде и понатаму нема потврда дали бугарскиот премиер Димитар Желјазков ќе прифати состанок со македонската претседателка Гордана Сиљановска-Давкова на маргините на настанот.
Тишината од бугарска страна доаѓа во момент кога Европската комисија, пред два дена, јавно го охрабри дијалогот меѓу Скопје и Софија, но повторно истакна дека од Македонија очекува усвојување на уставните измени произлезени од преговорите. Премиерот Христијан Мицкоски минатата недела изјави дека е во постојана комуникација со Брисел и дека веќе постои предложен термин за евентуална средба на највисоко ниво, без да открие детали.
Во таков амбиент, исходот од можниот билатерален разговор ќе ја одреди не само динамиката на македонско-бугарските односи, туку и тонот со кој Скопје ќе настапи на самитот што започнува утре.
ИЗВОР: racin.mk
