Собранието на Република Северна Македонија денеска, во рамки на 54. седница, ќе расправа по предлогот на Владата Азир Алиу да биде именуван за нов министер за здравство. На дневниот ред на седницата е и предлогот за назначување на Албрим Хоџа за заменик-министер за земјоделство, шумарство и водостопанство.
Предлогот за Алиу, кој е потпишан лично од премиерот Христијан Мицкоски, содржи и биографија на кандидатот. Според доставените информации, Алиу е дипломиран електроинженер и доктор по информатички науки, а моментно работи како редовен професор на Факултетот за компјутерски науки и технологии при Универзитетот на Југоисточна Европа во Тетово. Тој веќе има искуство во извршната власт – во 2023 и 2024 година ја извршуваше функцијата министер за информатичко општество и администрација, а бил и на други високи и одговорни позиции.
Премиерот Мицкоски минатата недела изјави дека очекува добра и конструктивна соработка со Алиу како дел од новата влада. Поддршка за неговата кандидатура пристигна и од првиот вицепремиер и министер за животна средина, Изет Меџити, кој го оцени Алиу како најсоодветен избор за оваа позиција, нагласувајќи дека на Министерството за здравство му е потребен способен менаџер кој го познава системот и може да придонесе за негово унапредување.
Алиу доаѓа од редовите на Алијансата за Албанците, партија која остана дел од коалицијата Вреди и покрај оставката на нејзиниот лидер Арбен Таравари на 15 мај, кој реши да премине во опозиција.
На седницата ќе се разгледува и предлогот Албрим Хоџа да биде назначен за заменик-министер за земјоделство, шумарство и водостопанство. Биографските податоци за Хоџа покажуваат дека тој е дипломиран правник и новинар со долгогодишно искуство во медиумите, а образованието го стекнал на Правниот факултет при Државниот универзитет во Тетово.
ИЗВОР: ТВ 21
