Со јавен градски автобус, заедно со општински соработници и новинарите, градоначалникот на Тетово, Биљал Касами се упати кон Попова Шапка.
Оваа автобуска линија ќе биде редовна во текот на викендите.
А, на Попова Шапка официјално започна новата ски сезона.
Градоначалникот се пофали дека сета потребна опрема, вклучувајќи ги и ски-лифтовите се сервисирани и се подготвени за употреба.
„За кратко време е направена многу работа, за што им честитам на раководните лица на туристичкиот центар што го ставија овој центар во функција и од денеска ќе биде во служба на граѓаните. Во наредниот период и како локална власт и како Влада ќе работиме напорно за постепено враќање на некогашниот сјај на туристичкиот центар на Попова Шапка“, вели Касами.
Касами верува во успешна сезона, додека вети дека ќе ја направи Попова Шапка најважна во регионот.
Вчера биле бесплатни билетите за ски-лифт. Од денеска дневен билет чини 1100 денари. Директорот на туристичкиот центар Гани Алији информираше за распоредите.
„Од сабота ски центарот ќе има редовни цени и редовно работно време.По бројните подготвителни активности, сега сме подготвени да понудиме незаборавно искуство за љубителите на зимските спортови. Благодарение на тимот и нивната неуморна работа, скијачките патеки се подготвени за зимските активности“, вели Гани Алији.
За да се избегнат долгите редици, општина Тетово ги замолува граѓаните да ја користат автобуската линија за време на викендот. Недостатокот на паркинг места останува голем проблем во туристичкиот центар Попова Шапка.
ИЗВОР: ТВ 21
