Петер Пелегрини, при официјалната посета на Македонија, денеска го посети и средното училиште – СУГС „Марија Кири – Склодовска“ – Скопје во општината Аеродром, каде присуствуваше на еден од наставните часови по практична настава, а на кој учениците го прикажаа своето знаење и стручни вештини.
Следејќи го процесот на преработка на био отпад и масло во био дизел, којшто го работеле учениците на часот по практична настава, директорот на училиштето Дарко Спасев и словачкиот претседател разговараа за сличностите и разликите во образовниот процес во двете држави, а оставиле и простор за идна соработка меѓу ова училиште со соодветни образовни институции во Словачка.
Директорот на училиштето Дарко Спасев објавувајќи фотографии од посетата не го криеше задоволството од посетата.
-Оваа посета за нас претставува голем настан и чест, а тоа е потврда дека трудот на наставниците и успесите на учениците се препознаени и ценети од меѓународните партнери. Посетата остави пријатни впечатоци и се почувствува топлината и ентузијазмот со кои нашите ученици и наставници ја граделе оваа заедница на знаење, пријателство и почит, објави директорот на СУГС „Марија Кири – Склодовска“ во Скопје, Дарко Спасев.
Извор: kurir.mk
