Претседателката Гордана Сиљановска-Давкова денеска во вилата „Билјана“ во Охрид се сретна со заменик-претседателот на Владата и министер за надворешни работи на Чешката Република, Петр Мацинка.
На средбата, како што информира Сиљановска-Давкова, било констатирано дека односите меѓу Македонија и Чешка се карактеризираат со традиционално пријателство, меѓусебна почит и разбирање.
Соговорниците се осврнале и на заедничкото културно и историско наследство, при што посебно било истакнато делото на просветителите Свети Кирил и Методиј, како важна поврзувачка и обединувачка вредност за двата народа.
Во фокусот на разговорот бил европскиот пат на Македонија и на земјите од Западен Балкан. Сиљановска-Давкова посочила дека долгогодишниот кандидатски статус на земјата за членство во Европската Унија не е резултат на неусогласеност со европското право и практика, туку, според неа, на блокади од страна на одделни соседи поради прашања од идентитетски карактер.
„Дводеценискиот кандидатски статус за членство во ЕУ не произлегува од неусогласеноста со европското право и практика, туку од блокадите на некои соседи од ирационален идентитетски карактер“, навела претседателката.
Чешкиот министер Мацинка, пак, ја потврдил оценката дека местото на Македонија е во Европската Унија.
Според него, на Чешката Република ѝ се потребни сојузници со слично минато, менталитет и култура.
Средбата во Охрид доаѓа во знак на продолжување на блиските политички и пријателски односи меѓу двете земји, со посебен акцент на европската перспектива на Македонија.
Извор: zurnal.mk
