Претседателката Гордана Сиљановска-Давкова денеска одржа обраќање на централната манифестација по повод 2 Август – Илинден, Денот на Републиката, на Мечкин Камен во Крушево, потенцирајќи ја вековната борба на македонскиот народ за самостојна и суверена држава.
Во својот говор, таа ги нагласи темелните вредности на Крушевскиот манифест, кој го нарече македонска Magna Carta Libertatum, повикувајќи на континуитет со илинденската и асномската традиција. Таа порача дека Република Македонија, прогласена во 1991 година, е легален и легитимен израз на правото на самоопределување, заснован врз волјата на граѓаните и принципите на слобода, правда и еднаквост.
– Идеалите од Крушевската Република не се локални, туку дел од пошироката европска револуционерна традиција – истакна Сиљановска-Давкова, поврзувајќи го македонскиот републиканизам со визиите на Џузепе Мацини и европското движење „Млада Европа“.
Таа подвлече дека Републиката постои заради сите граѓани, независно од нивната етничка, верска или социјална припадност, и додаде дека токму слободата и правдата се основните очекувања на граѓаните од државата.
– Ако се повикуваме на Крушевскиот манифест, мора да бидеме верни на неговата основна идеја – дека соживотот меѓу различните се гради само во присуство на правда и слобода, рече претседателката, повикувајќи на бескомпромисна борба против корупцијата, реформирано правосудство и еднаквост пред законот.
Во обраќањето, таа се осврна и на актуелната состојба, истакнувајќи дека државата се соочува со длабока институционална криза, но изрази уверување дека „новата пролет“ за македонската Република е возможна преку европеизација заснована на Копенхагенските критериуми.
– Ние не сме стебло без корен – порача Сиљановска-Давкова – нашата слобода и нашата Република се вкоренети во европската пролет на народите, во хуманите визии на Млада Европа.
На крајот од говорот, таа ја пренесе пораката на македонските револуционери и борци за слобода, повикувајќи на единство и истрајност во зацртаниот пат кон Европската Унија.
– Да ни е вековита македонската Република, зачната овде, во Крушевската! Да ни е вечна слободата! – заврши Сиљановска-Давкова.
ИЗВОР: ТВ 21
