Потегот следува откако Турција ја обвини Шведска оти засолнува курдски активисти, кои ги смета за терористи, и го блокира нејзиното членство во НАТО, барајќи нивна екстрадиција како чекор кон давање зелено светло на оваа земја за приклучување кон Алијансата
Владата на Шведска денеска соопшти дека ќе екстрадира 35-годишен маж – приврзаник на Курдската работничка партија (ПКК) во Турција, кој во татковината е осуден поради илегална трговија со дрога.
Потегот следува откако Турција ја обвини Шведска дека засолнува членови на терористички групи и побара нивна екстрадиција како чекор кон давање зелено светло на оваа земја за нејзиното членство во НАТО.
Шведското Министерство за правда, кое не го идентификуваше мажот, потврди дека владата во Стокхолм ја одобрила пресудата на шведскиот Врховен суд кој одлучи дека нема пречки за негова екстрадиција.
Триесет и петгодишникот, пак, тврди дека вистинската причина поради која го бараат турските власти се неговите врски со прокурдската Народна демократска партија (ХДП) и поради тоа што покажал поддршка за Курдската работничка партија (ПКК). Тврди оти Анкара го прогонува само поради неговата политичка инволвираност.
Турција веќе 13 месеци го блокира влезот на Шведска во НАТО поради попустливост кон курдските активисти на нејзина територија. Анкара бара да бидат екстрадирани десетици поддржувачи на ПКК кои живеат во Шведска и кои ги смета за терористи.
Извор: 360stepeni.mk
