БЕРН (АА) – Швајцарија ја повтори својата „непоколеблива поддршка“ за Меѓународниот кривичен суд (МКС) како независна и непристрасна судска институција, пренесува Анадолу.
Швајцарското Министерство за надворешни работи издаде соопштение за истрагата на МКС за ситуацијата во Палестина, изразувајќи поддршка за Судот како држава членка на Римскиот статут.
„Остануваме посветени на меѓународниот поредок заснован врз правила“, се вели во соопштението.
Во соопштението се нагласува дека МКС „е интегрален дел од овој поредок и клучна институција во борбата против неказнивоста и извршувањето на правдата, кои се суштински компоненти на одржливиот мир, безбедност и помирување“.
Во соопштението се вели дека МКС е надлежен за ситуацијата во Палестина и обвинителите ја истражуваат ситуацијата од март 2021 година.
„Оваа истрага опфаќа постапки што може да претставуваат злосторства според Римскиот статут извршени од 13 јуни 2014 година во Газа и на Западниот Брег, вклучително и Источен Кудс (Ерусалим)“, соопшти Министерството.
Повикувајќи се на обвинителите, се наведува дека истрагата ги опфаќа и нападите што се случија на 7 октомври.
„Швајцарија ќе продолжи целосно да ги поддржува МКС и неговата работа во однос на сите околности што потпаѓаат под негова надлежност“, соопшти Министерството, повикувајќи ги сите држави да обезбедат целосна соработка со Меѓународниот кривичен суд.
Израел започна немилосрдни воздушни и копнени напади во Појасот Газа по нападот на Хамас, при што загинаа повеќе од 14.128 Палестинци, вклучително 5.840 деца и 3.920 жени, според здравствените власти во енклавата.
Илјадници згради, вклучително болници, џамии и цркви, се оштетени или уништени во израелската офанзива.
Според официјални податоци, бројот на загинати Израелци изнесува околу 1.200.
