Даниелс тврдеше дека парите во замена да молчи за аферата ги добила само неколку дена пред претседателските избори во 2016 година, а ги прифатила бидејќи била загрижена за безбедноста на своето семејство. Аферата наводно се случила во 2006 година, во хотелската соба на Трамп кај езерото Тахо
Доналд Трамп стана првиот поранешен претседател на САД кој се соочува со кривични обвиненија бидејќи ѝ дал пари на порноактерката Сторми Даниелс да молчи за нивна афера што ја имале во минатото.
Големата порота што ја оформи окружниот обвинител на Менхетн, Алвин Брег, како што јавија американските медиуми, гласала да се покрене обвинение. Обвинителот ја оформи големата порота на почетокот на годинава со цел да испита дали има доволно докази за кривично гонење. Таа заседава зад затворени врати, а гласањето за случајот со Трамп се случило вчера.
Поранешниот претседател живее на Флорида, а поради обвиненијата се очекува в понеделник да лета за Њујорк, а веќе во вторник да биде изведен пред судот на рочиште кое е предвидено да трае 15-ина минути со цел да му се прочитаат обвиненијата против него.
Безбедноста во судот на Менхетен ќе биде подигната на највисоко ниво и за неа ќе биде задолжена тајната служба на САД надлежна да ги заштитува поранешните американски претседатели.
Детали од обвинението засега не се познати, но што е она што е познато досега во јавноста за Трамп и порноактерката Сторми Даниелс?
Нејзиното вистинско име е Стефани Клифорд. Обвиненија во јавноста излегоа во 2018 година. Според нејзините тврдења, таа прифатила 130 000 долари од адвокатот на Трамп, Мајкл Коен, пред претседателските избори во 2016 на кои тој победи, во замена да молчи за нивната афера.
Трамп од своја страна негираше дека имал каква било сексуална врска со Даниелс, а по денешната информација за обвинението тој се огласи велејќи дека ова е „лов на вештерки“.
„Трамп не изгледаше загрижен. Беше арогантен“
Двајцата, според изјавите на порноактерката, се запознале на хуманитарен голф-турнир во јули 2006 година. Таа тврдеше дека имале секс еднаш во неговата хотелска соба кај езерото Тахо, одморалиште што се наоѓа помеѓу Калифорнија и Невада.
„Изгледаше дека не е загрижен за тоа. Беше некако арогантен“,
одговори таа во едно интервју кога ја прашаа дали Трамп барал од неа да молчи за нивната наводна заедничка моќ.
Трамп тогаш бил сам на настанот, а неговата сопруга Меланија Трамп била штотуку породена.
Порноактерката тврди дека добивала закани
Даниелс тврдеше дека парите во замена да молчи за аферата ги добила само неколку дена пред претседателските избори во 2016 година, а ги прифатила бидејќи била загрижена за безбедноста на своето семејство.
Според нејзините јавни сведочења, таа годините претходно добивала закани да молчи. Па така, во 2011 година, набргу откако се согласила да даде интервју за списанието „Ин тач“, тврди дека на паркинг во Лас Вегас неа и на нејзината ќерка, која тогаш била доенче, им пришол непознат маж и ѝ порачал „да го остави Трамп на мир“.
„Таа е прекрасно девојче. Би било штета ако нешто ѝ се случи на мајка ѝ“,
рече Даниел за Си-би-си во 2018 година сеќавајќи се на заканите што ги добивала за интервјуто од 2011.
Интервјуто со „Ин тач“ до 2011 целосно беше објавено дури во 2018 година.
Пред емитувањето, според нејзините тврдења, компанија поврзана со адвокатот Коен ѝ се заканила со тужба од 20 милиони долари бидејќи го прекршила „договорот за молчење“.
Што е незаконски во случајот?
Исплатата во замена за молк, пишуваат американските медиуми, не е незаконска, но бидејќи во случајот била извршена непосредно пред претседателските избори критичарите изминатите години тврдеа дека ова може да значи прекршување на законските одредби поврзани со изборната кампања.
Иако адвокатот Коен првично жестоко отфрлаше дека Трамп има некаква врска со парите што тој ѝ ги исплатил на порноактерката, подоцна во сведочење под заклетва рече дека поранешниот претседател му рекол да ја направи исплатата на 130 000 долари. Исто така, Коен кажа и оти Трамп потоа нему му ги надоместил парите.
Поранешниот претседател призна дека лично ја надоместил исплатата на адвокатот, што не е нелегално, но негираше дека имал каква било афера со актерката, како и какво било незаконско постапување во однос на изборните закони.
Адвокатот Коен, за потсетување, подоцна беше уапсен поради обвинение со повеќе точки, а потоа призна вина за кршење на законите во текот на кампањата за претседателските избори во 2016 година.
ИЗВОР: 360stepeni.mk
