Шпанките се први во Европа кои ќе можат да земат менструално отсуство

Времетраењето на отсуството не е ограничено и според законот, тоа зависи колку жените имаат болни менструации и колку дена трае болката. Трошоците за отсуство ги покрива државата

Во Шпанија денеска стапи на сила законот за сексуално и репродуктивно здравје, кој го вклучува правото на жените на менструално отсуство.

На Шпанките им е потребно одобрение од лекар за да го остварат правото на менструално отсуство. Времетраењето на отсуството не е ограничено и според законот, тоа зависи колку жените имаат болни менструации и колку дена трае болката. Трошоците за отсуство ги покрива државата.

Предлог-законот беше одобрен во парламентот во февруари, а министерката за еднаквост, Ајрене Монтеро, тогаш рече дека тоа е „историски ден за унапредување на правата на жените“. Оттогаш, усвоени се некои амандмани за да се олесни пристапот до абортус и промена на полот.

Менструалното отсуство не е вообичаена практика. Во Тајван жените можат да останат дома само три дена во годината, а потоа добиваат само 50 отсто од платата. Во Јужна Кореја, работодавците мора да им дадат на жените еден слободен ден во месецот доколку тоа го побараат, но законот не регулира кој плаќа за тоа.