АНКАРА (АА) – Шпанскиот премиер Педро Санчез го обнови својот повик до земјите членки на ЕУ што не ја признаваат Палестина да го прекинат извозот на оружје во Израел, јавува Анадолу.
Говорејќи на прес-конференцијата по состанокот на Европскиот совет во Брисел вчера, Санчез ја нагласи потребата од „доследност на Блискиот Исток и почитување на меѓународното право“. Тој ги повика земјите што сè уште не ја признале Палестина да престанат да му доставуваат оружје на Израел за да обезбедат доследност во своите политики.
Санчез потсети дека Шпанија го прекинала извозот на оружје во Израел на 7 октомври минатата година и ги охрабри другите нации да го следат примерот, со цел да се изврши притисок врз израелскиот премиер Бенјамин Нетанјаху да го запре ескалирањето на насилството во регионот.
Дополнително Санчез спомена дека Шпанија и Ирска го повториле својот повик за ревизија на трговскиот договор на ЕУ со Израел.
Тој одговори и на критиките на Нетанјаху за мировниците на ОН во Либан, наведувајќи дека силите на УНИФИЛ ќе останат во областа.
Со Резолуцијата 1701 на ОН, усвоена во 2006 година, се повикува на прекин на огнот меѓу Либан и Израел, воспоставувајќи демилитаризирана зона помеѓу Сината линија – границата Либан-Израел – и реката Литани, со тоа што само либански сили и УНИФИЛ беа овластени да дејствуваат таму.
Израел постојано ги гаѓаше позициите на УНИФИЛ во Јужен Либан последните денови, предизвикувајќи глобална осуда и загриженост за пошироките воени намери. Нападите се совпаѓаат со израелските воздушни напади врз наводните цели на Хезболах низ Либан.
Според официјалните извештаи, од крајот на септември во израелските напади врз Либан се убиени над 1.500 луѓе, повредени се повеќе од 4.500 и раселени се најмалку 1,34 милиони.
Врз основа на бројките на либанските власти, вкупниот број загинати во израелските напади од октомври минатата година сега надминува 13.000.
Извор: Anadolu Agency (AA)
