Адвокатот Петре Шилегов денеска во судница побара од Обвинителството сериозно да го преиспита својот став и да повлече дел од обвиненијата, повикувајќи се на економичноста на постапката и на најновиот брифинг од Обвинителството за гонење на организиран криминал и корупција (ОЈО ГОКК). Тој предупреди дека државата троши огромни суми за судски процес кој може да биде правно неоснован.
Аргументот на Шилегов: Нема „тешки дела“ без директна врска
Шилегов се повика на одлуката на ОЈО ГОКК за истиот кривично-правен настан, каде за седум лица (полицајци) е отфрлена истрагата за „тешки дела против општата сигурност“.
- Образложение: Таму било утврдено дека нема директна причинско-последична врска за непостапувањето, па затоа тие би можеле да одговараат само за „злоупотреба на службена положба“, дело кое е веќе застарено.
Шилегов смета дека оваа логика треба да се примени и овде:
„Од тука укажувам на судот и обвинителството сериозно да го испитате вашиот став и мислење, бидејќи сте контрадикторни… Обвинителството да провери и за дел од обвинетите да го повлече обвинението“, истакна Шилегов.
Судијката Груевска: „Чекаме став од обвинителот“
Судијката Диана Груевска Илиевска потврди дека Судот е запознаен со брифингот и ја побарала одлуката, но нагласи дека судењето мора да тече.
„Судот и те како се интересираше за тој брифинг… но во овој момент додека не се произнесе ова обвинителство тука, ние мора да ја продолжиме постапката“, рече таа.
Обвинителот Јанев: „Овде не судиме полицајци“
Обвинителот Борче Јанев веднаш реагираше, отфрлајќи ги наводите на одбраната како преуранети и несоодветни за овој предмет.
- Немаат увид: Тој посочи дека ОЈО сè уште ги нема на увид одлуките на ОЈО ГОКК.
- Различни функции: Јанев нагласи дека овој обвинителен акт не опфаќа полициски службеници, туку лица со сосема различни овластувања.
- Одлуките не се конечни: Обвинителот потсети дека одлуките на ГОКК подлежат на жалби од оштетените и сè уште не се правосилни.
