Оставката на Хејстингс се совпадна со објавувањето на деловниот извештај за четвртиот квартал од минатата година, кој покажа зголемување на бројот на претплатници за 7,66 милиони благодарение на сериите Хари и Меган и Среда
Коосновачот на Нетфликс, Рид Хејстингс, се повлече од функцијата извршен директор на компанијата што го потресе Холивуд со стриминг на филмови и ТВ серии на интернет, но се соочи со проблеми со наплатата и опаѓање на гледаноста во изминатата година.
Досега Хестингс ја извршуваше функцијата извршен директор заедно со долгогодишниот соработник Тед Сарандос, кој сега оваа функција ќе ја дели со поранешниот главен оперативен директор Грег Питерс. Питерс и Сарандос беа промовирани во јули 2020 година, за време на многу предизвикувачки период за компанијата.
„Тоа беше огнено крштевање, поради ковид и предизвиците во нашиот бизнис“,
рече Хестингс, кој сега ќе ја извршува функцијата претседател на одборот на директори.
Оставката на Хејстингс се совпадна со објавувањето на деловниот извештај за четвртиот квартал од минатата година, кој покажа зголемување на бројот на претплатници за 7,66 милиони благодарение на сериите Хари и Меган и Среда.
Во првата половина од минатата година Нетфликс загуби претплатници, чиј број повторно се зголеми од јули до декември, но помалку од претходните години. На крајот на минатата година компанијата имаше 231 милион претплатници, 4,5 отсто повеќе отколку на крајот на 2021 година.
Во последните три месеци од минатата година, нето добивката на Нетфликс речиси се стопи во споредба со истиот период во 2021 година, лизгајќи се од 607 милиони долари на само 55 милиони долари. Приходите се зголемија за 1,9 отсто на 7,85 милијарди долари.
„2022 беше тешка година, со проблематичен почеток, но подобар крај. Веруваме дека изготвивме јасен пат кој треба да ни помогне повторно да ги зголемиме приходите“,
се вели во кварталното писмо на Нетфликс до акционерите.
За да го поттикне растот, Нетфликс во ноември воведе поевтина опција поддржана од реклами во 12 земји. Мрежата најави и мерки за спречување на споделување лозинка.
Извор: 360stepeni.mk
