Со тоа што во процесот на европска интеграција би ѝ се дало предност на Украина пред земјите од Балканот, вели шефот на австриската дипломатија, тоа би можело да ја загрози стабилноста на Западниот Балкан и дополнително да го зголеми влијанието на Кина, Русија, Турција или други земји
Би било катастрофално ако Украина и Молдавија влезат во Европската Унија преку брза лента, а земјите од Западен Балкан да останат на страна, вели министерот за надворешни работи на Австрија, Александар Шаленберг во интервју за германскиот весник „Велт“.
Тој вели оти Украина треба да ѝ се приклучи кон Унијата веднаш штом ќе ги исполни обврските, но дека таа не треба да биде приоритет за ЕУ.
„Украина ќе влезе во ЕУ веднаш штом ќе се исполнат условите. Не треба да има двостепено општество. Во Солун пред 20 години им ветивме на земјите од Југоисточна Европа дека ќе ни се придружат“,
кажа Шаленберг во интервјуто за „Велт“.
Фото: EPA-EFE/CHRISTIAN BRUNA
Со тоа што во процесот на европска интеграција би ѝ се дало предност на Украина пред земјите од Балканот, вели Шаленберг, тоа би можело да ја загрози стабилноста на Западниот Балкан и дополнително да го зголеми влијанието на Кина, Русија, Турција или други земји.
Говорејќи за руско-украинскиот конфликт, шефот на австриската дипломатија смета дека Западот треба да продолжи да преговара со Русија, како што тоа го прави американската Влада, бидејќи, како што вели, оваа земја е најголемиот географски сосед на ЕУ и најголемата нуклеарна сила на планетата.
Украина во февруари минатата година поднесе барање за влез во Европската Унија, а во јуни доби кандидатски статус. Киев очекува дека влезот во ЕУ ќе се случи многу брзо, но ставот на европските политичари е дека постапката нема да се забрза и дека Киев мора да исполни многу услови, вклучително и интензивирање на борбата против корупцијата.
Извор: 360stepeni.mk
