Севернокорејскиот лидер му се пофали на Шојгу со нуклеарниот арсенал на земјата

Северна Кореја е домаќин на делегации од Русија и Кина кои присуствуваат на одбележувањето на 70-годишнината од примирјето на Корејската војна, повод по кој вообичено во Пјонгјанг се одржува воена парада

Лидерот на Северна Кореја, Ким Џон Ун, вчера му ги покажа најновите оржуја на земјата на министерот за одбрана на Русија, Сергеј Шојгу, кој е во официјална посета на Пјонгјанг, јавуваат светските новински агенции.

Меѓу оружјето изложено на презентацијата, била и интерконтиненталната балистичка ракета Хвасонг (ИЦМБ).

Инаку, како што се наведува во медиумските извештаи што ги пренесува регионалниот сервис на Радио Слободна Европа, се верува дека ракетата Хвасонг, која беше успешно тестирана во април, е првата која користи цврсти горива, што ја прави побрза за лансирање од оние на течни горива.

Ракетите со нуклеарен капацитет се забранети согласно резолуциите на Советот за безбедност на Обединетите нации (ОН), вклучитечно и со поддршка на Русија и Кина како постојани членки на Советот, но оваа недела тие беа впечатлива позадина во демонстрацијата на солидарност меѓу трите земји (Русија, Кина и Северна Кореја), обединети во нивното ривалство со Соединетите Американски Држави (САД), пишува Ројтерс.

На презентацијата во чест на посетата на Шојгу биле изложени и два нови дизајни на беспилотни летала, меѓу кои и оној кој наликува на примарниот офанзивен дрон што го користат американските воздухопловни сили, наведува Ен-ка Њуз.

Северна Кореја е домаќин на делегации од Русија и Кина кои присуствуваат на одбележувањето на 70-годишнината од примирјето на Корејската војна, повод по кој вообичено во Пјонјанг се одржува воена парада.

За потсетување, есента 1950 година Пекинг испрати војници за да ја поддржат Северна Кореја во војната против Јужна Кореја. Пјонгјанг во војната ја имаше и поддршката од тогашниот Советски сојуз.

Инаку, средбата меѓу севернокорејскиот лидер Ким Џонг Ун и министерот за одбрана на Русија Сергеј Шојгу се одржа вчера.

Русија и Северна Кореја планираат да ја зајакнат соработката на полето на одбраната, изјави рускиот министер за одбрана по разговорот со севернокорејскиот колега, пренесува Ројтерс.

„Убеден сум дека денешните разговори ќе придонесат за зајакнување на соработката меѓу нашите одбранбени оддели“,

рече Шојгу во соопштението објавено од руското Министерство за одбрана на 26 јули.

Русија е под западни санкции и изолација поради агресијата против соседна Украина што ја започна во февруари 2022 година.