Додека обилните дождови и невремето и понатаму ја погодуваат Северна Италија, високите температури продолжуваат во централните и јужните области на земјата, јавуваат локалните медиуми, пренесува Анадолу.
Град „со големина на тениски топки“ ги погоди градовите Тревизо и Падова, додека силен дожд падна во Виченца, Верона и Венеција, при што има повредени и предизвикана е материјална штета.
Гувернерот Лука Заја објави дека 110 лица се повредени во северниот регион Венето од градот што ги искршил стаклата на автомобилите, а има и други значителни материјални штети.
Италијанската асоцијација на фармери (Колдирети), огранок во Венето, исто така, соопшти дека земјоделските полиња и лозјата во северните региони се погодени од силниот град.
Силите за цивилна одбрана, исто така, предупредија за можна појава на грмежи, град и силен ветер во регионите на Ломбардија, Венето, Фурланија-Јулиска Краина, автономната провинција Болцано и Емилија Ромања.
Од друга страна, Централна и Јужна Италија и понатаму се зафатени со екстремни горештини со потекло од Африка.
Министерството за здравство издаде јавно предупредување со кое прогласи 18 града под „црвено“ ниво на екстремна жештина за време на викендот, за разлика од 23 града во четвртокот.
Нагласено е дека високите температури, кои го зафатија регионот во текот на изминатата недела, може да продолжат и за време на викендот, а на некои места ќе се движат и до 45-47 Целзиусови степени.
Извор: www.aa.com.tr
