Министерката за финансии, Гордана Димитриеска Кочоска изјави дека вториот пензиски столб бил непотребен и само креирал дополнителен трошок.
Таа во емисијата „Бизнис21“ на ТВ21 најави дека се залага за укинување на вториот пензиски столб, кој само одлевал пари.
„Јас сметам дека вториот столб е непотребен, затоа што таму ни се одлеваат пари кои што повторно завршуваат во државата, бидејќи тие пензиски друштва всушност ги инвестираат парите во државата, значи дополнителен трошок ни прават“, вели Димитриеска Кочоска.
Министерката ги повиќа граѓаните да си проверат колку пари им се оплодени во вториот пензиски столб.
Таа потенцираше дека ова е нејзин став, кој не нужно значи дека е и став на владата, но во јавноста покрена дилеми за тоа дали владата размислува за национализација и преземање на вториот пензиски столб.
Вториот столб опфаќа задолжително капитално финансирано пензиско осигурување, што значи дека дел од вкупно уплатениот придонес за пензиско осигурување се пренесува на индивидуална сметка на осигуреникот во приватен пензиски фонд. Висината на придонесот кој се пренесува во приватниот пензиски фонд изнесува 6% од бруто платата. Овие средства се наменети за исплата на пензија од вториот столб лично на членот, истите се инвестираат во финансиски инструменти, а остварената добивка се припишува кон индивидуалната сметка.
Бидејќи средствата од индивидуалната пензиска сметка се лични и доколку не се искористат за нивната основна намена истите се предмет на наследување (под услов членови на семејството да не користат семејна пензија од починатиот член) или предмет на исплата по навршени 65 години старост (ако членот не оствари право на старосна пензија).
ИЗВОР: racin.mk
