„Цените во маркетите растат а граѓаните живеат се потешко. Џабе е зголемен бројот на производи кои се дел од т.н ‘новогодишна кошничка’ кога трговците веќе ги зголемија цените на овие производи“, реагираат денеска од СДСМ.
Политиките на власта со „кошнички“ се промашени и немаат никаков ефект, истакнуваат од партијата, а измамата со кошничките граѓаните ја гледаат секој ден во маркетите каде што цените се зголемени.
Тоа го потврдуваат и последните податоци на Државниот завод за статистика кои покажуваат поголема инфлација за 4,3% во месец ноември и зголемување на цените на мало за 3,5%, посочуваат во реакцијата.
За СДСМ „Високите цени и инфлацијата ги јадат семејните буџети, граѓаните имаат се помалку пари а тоа води кон поголема сиромаштија“.
„Лошите политики на Мицкоски удираат директно по џебот на народот. Наместо лаги и манипулации власта треба да почне нешто да работи за заштита на стандардот на граѓаните и да ги прифати издржаните предлози на СДСМ за намалување на цените и зголемување на платите“, укажуваат од најголемата опозициска партија.
ИЗВОР: racin.mk
