На денешниот Саем-Отчет по повод „4 години работа за тебе“ се обрати градоначалникот на општина Гевгелија, Андон Сарамандов кој се осврна на меѓународната соработка и колку е таа значајна за општина Гевгелија со што ги објасни придобивките на општината заради нејзината местоположба и близина со Република Грција.
„Грчките државјани се секојдневно присутни во нашиот град во текот на целата година, но тие не се само гости тие се на некој начин тие се партнер на нашата локална економија, најголем дел од малите стопанственици од Гевгелија зависат токму од приходите остварени од грчките државјани и од транзитните туристи, ние сме еден добар пример каде што добрата местоположба и добрососедските односи придонесуваат за финансиско зајакнување на една локална заедница како Гевгелија“, рече Сарамандов.
Сарамандов објасни дека како резултат на добрата соработка со грчката амбасада во тек е отворање на трговски центар кој ќе овозможи 150 нови работни места како и инвестиција за отворање на нов ритејл парк кој ќе овозможи 400 нови вработувања.
„Како локална самоуправа воспоставивме добра комуникација и со грчката амбасада, по препорака на амбасадата на Република Грција во тек е реализација и инвестиција во Гевгелија на потегот до граничниот премин, трговски центар којшто ќе овозможи 150 нови вработувања и ќе даде дополнителен инпут на локалната економија во Гевгелија. Во изминатите четири години со цел да ги искористиме можностите што ни ги дава оваа местоположба беа реализирани повеќе инфраструктурни проекти, беше изготвена туристичка платформа на градот, беа донесени нови урбанистички планови и како резултат на нашата отвореност кон приватниот сектор имаме уште една инвестиција модерен ретаил парк кој во наредниот период ќе овозможи 400 нови вработувања“, истакна Сарамандов.
Извор: kurir.mk
