Ова е сторија за Душица Јовановска, 28 годишна од село Конопица, Крива Паланка. Самохрана мајка на дете со аутизам. Таа живее со нејзиното синче Давид и нејзината мајка. Душица од самиот почеток, сама се бори за Давид, нејзиниот 7 годишен син за да му обезбеди подобри услови за живот. Но се чини дека ја губи оваа битка бидејќи на Давид му е потребно барем три пати во неделата да посетува логопед, но Душица нема финансиски средства за да му го овозможи тоа.
Објектот во кој живеат, бидејќи тоа не може да се нарече куќа, е со една соба и ходник кој служи како кујна но и бања, во кој нема ниту греење. Душица вели дека се капат во корито бидејќи немаат бања. Пред неколку години започнале да градат една соба и бања до куќата во која живеат но поради недостиг од финансии, градбата запрела на пола.
Бидејќи сите тројца живеат во една соба, таа соба е и дневна и спална. Душица од сите хумани луѓе бара да и помогнат да го доврши објектот кој е оставен на половина. Таа тоа не може да го стори сама бидејќи поради состојбата на Давид не може да работи а нејзиниот единствен приход е помошта од државата од 11 илјади денари.
Душица се надева дека хуманите луѓе ќе и помогнат најмногу поради Давид, и тој како и сите други деца да има барем малку посреќно детство.
ИЗВОР: ТВ 21
