АНКАРА (АА) – Претставничкиот дом на американската сојузна држава Флорида донесе одлука за забрана за пристап до социјалните мрежи за деца помлади од 16 години, пренесува Анадолу.
За новиот закон гласаа 106 пратеници, а 13 беа против.
Пол Ренер, претседател на Претставничкиот дом, тврди дека животот на интернет го загрозил менталното здравје на тинејџерите во Флорида и ги довело во опасност, пренесе порталот „Флорида политик“.
„Децата отсекогаш се соочувале со злобни девојчиња и момчиња, но социјалните мрежи ја сменија играта и предизвикаа невидена штета врз менталното здравје на нашите деца“, рече Ренер.
Тој истакна дека е неопходно решавање на штетните ефекти на социјалните мрежи врз развојот и благосостојбата на децата.
„Флорида има уверлив државен интерес и должност да ги заштити нашите деца, нивното ментално здравје и нивното детство“, објави Ренер по седницата на платформата Х.
Поддржувачите на законот велат дека опасното опкружување на социјалните мрежи не може да се занемари.
Пратеникот Тајлер Сироис рече дека содржината на социјалните мрежи намерно е креирана на начин да создаде зависност кај младата популација и повеќе да служи како „дигитална дрога“ отколку како извор на забава.
Меѓутоа, демократите што се спротивставија на овој закон тврдат дека таква измена на државниот закон би ги отсекла патиштата за наоѓање позитивни заедници, па дури и за започнување бизниси. Дури критичарите тврдат дека оваа мерка ги загрозува правата на родителите.
Мета, компанијата што ги поседува Фејсбук, Инстаграм и други платформи на социјални медиуми, го повика Претставничкиот дом да бара друго решение, како што е, на пример, барање родителско одобрение за преземање на апликацијата.
„Голем број тинејџери денес користат интернет и апликации за одговорно да соберат информации и да учат за новите можности, вклучително и работа со скратено работно време, високо образование, граѓански или црковни собири и воена служба“, напиша до Претставничкиот дом Колдер Харвил-Чајлдс, претставник на Мета.
Извор: Anadolu Agency (AA)
