Неколку бродови на американската морнарица влегоа и пловеа низ Ормутскиот теснец и тоа за време на преговорите помеѓу САД и Пакистан, потврди американски функционер. Ова е прво поминување на американски воени бродови низ тој теснец од почетокот на војната, а според извори од Вашингтон, операцијата е спроведена без координација со Иран.
Целта на маневрот е да се зајакне довербата на екипажите на комерцијалните бродови во моментот кога во Пакистан започнуваат мировните преговори меѓу страните во конфликтот. Американскиот функционер истакна дека операцијата имала исклучиво за цел да обезбеди слобода на пловидба во меѓународните води.
Од друга страна, иранската новинска агенција Тасним ги пренесува изјавите на висок безбедносен функционер кој категорично ги отфрла американските тврдења и нагласува дека ниту еден брод не поминал низ теснецот откако стапи на сила прекинот на огнот.
Портпаролот на иранското Министерство за надворешни работи тврди дека американски разорувач се обидел да влезе во теснецот, но се повлекол по недвосмислено предупредување од вооружените сили на Иран, со што се спречило потенцијално кршење на прекинот на огнот.
Според ирански извори, Техеран конкретно го информирал пакистанскиот медијатор дека бродот ќе биде нападнат во рок од 30 минути ако продолжи да се движи, што би предизвикало непоправлива штета на преговорите меѓу САД и Иран.
Повторното отворање на теснецот, стратешки клучен премин долж јужниот брег на Иран, беше една од главните одредби на договорот за прекин на огнот. Иако тој воден пат е клучен за глобалната економија, само неколку бродови поминаа низ него во деновите по објавувањето на прекинот на огнот, бидејќи, според тврдењата на Вашингтон, екипажите биле заплашени од иранскиот притисок.
По повод операцијата, претседателот Трамп се огласи и на социјалната мрежа Truth Social, наведувајќи дека заканата од морски мини е единствената алатка што Иран ја користи за да го спречи преминувањето. Тој додаде дека процесот на чистење на Ормутскиот теснец е започнат како услуга за земјите од целиот свет, вклучувајќи ги Кина, Јапонија, Јужна Кореја, Франција и Германија.
Пред разговорите, кои започнуваат во атмосфера на длабока недоверба и за кои не е утврден ниту дневниот ред ниту директниот или индиректниот формат, премиерот се сретна и со иранската делегација.
Поздравувајќи ја посветеноста на двете делегации на конструктивен дијалог, премиерот изрази надеж дека овие разговори ќе резултираат со траен мир во регионот.
Извор: vecer.mk
