Генералниот секретар на НАТО, Марк Руте, изјави дека рускиот лидер Владимир Путин треба да запомни дека нуклеарна војна никогаш не смее да се започне бидејќи не може да се добие.
Путин мора да знае дека нуклеарна војна никогаш не може да се добие и никогаш не смее да се води – рече Руте и ја нагласи важноста на нуклеарните капацитети на НАТО.
„Нуклеарното средство за одвраќање на НАТО е крајната гаранција за нашата безбедност. Важно е нашето нуклеарно средство за одвраќање да остане веродостојно, безбедно, сигурно и ефикасно“, истакна тој.
Руте, исто така, изрази мислење дека земјите од НАТО треба поотворено да разговараат со јавноста за нуклеарното одвраќање, за луѓето да разберат како тоа обезбедува колективна безбедност.
„Кога Русија користи опасна и неодговорна нуклеарна реторика, нашето население мора да знае дека нема потреба од паника, бидејќи НАТО има силно нуклеарно одвраќање, за зачувување на мирот, спречување на принуда и одвраќање од агресија“, објасни Руте во интервју за неделното издание на „Ди Велт“.
Извор: tv21
