ИСТАНБУЛ (АА) – Русија денес соопшти дека воведува ограничувања за 15 медиуми од Европската Унија (ЕУ) како одговор на мерките што ги презеде Брисел против руските медиуми претходно оваа година, јавува Анадолу.
„Руската страна донесе одлука да воведе контраограничувања за пристапот од територијата на Руската Федерација до веб-ресурсите на петнаесет медиуми од земјите членки на ЕУ, кои се вклучени во ширење лажни информации“, се вели во соопштението на руското Министерство за надворешни работи.
Во соопштението се вели дека мерките се преземени како одговор на ограничувањата наметнати од блокот од 27 членки во рамките на неговиот 16. пакет санкции одобрен во февруари за осум руски медиуми.
Руското Министерство додаде дека Брисел и земјите членки на ЕУ биле повеќепати предупредени дека забраните и „неоправданите ограничувања“ за руските медиуми ќе наидат на соодветен одговор од Москва.
„Одговорноста за овие случувања целосно ја сносат Европската Унија и земјите членки што ги поддржаа овие незаконски одлуки“, се нагласува во соопштението.
Дополнително се наведува дека Русија ќе ја преиспита својата најнова одлука за европските медиуми „доколку бидат укинати ограничувањата врз домашните публикации и информативни канали“.
Во соопштението не беа објавени конкретни имиња на европските медиуми што се опфатени со новите санкции од страна на Русија.
Европската Унија на 24 февруари го објави својот 16. пакет санкции за Русија, кој вклучи суспензија на дозволите за емитување на осум руски медиуми: Евроазија, Фондск, Лента, ЊузФронт, РуБалтик, СаутФронт, Фондација за стратегиска култура и Краснаја Sвезда.
Извор: Anadolu Agency (AA)
