ИСТАНБУЛ (АА) – Русија тврди дека Украина го исклучила главниот далновод поврзан со нуклеарната централа „Запорожје“, пренесува Анадолу.
„Украина рано утрово го исклучи 750-киловолтниот далновод Днепар“, изјави Ренат Карча, советник на „Росенергоатом“, подружница на руската државна нуклеарна агенција „Росатом“, за руската државна телевизија „Росија-24“.
Украинските власти сѐ уште не се огласија по повод тврдењето, а независната проверка на тврдењата на Русија е тешка поради воените дејства.
Ден претходно, Меѓународната агенција за атомска енергија (МААЕ) објави дека нуклеарната централа „Запорожје“ е повторно поврзана со единствениот достапен резервен далновод, но дека ситуацијата и понатаму е „исклучително кревка“.
„Конекцијата на нуклеарната централа Запорожје со единствениот преостанат 330-киловолтен далновод, од вкупно шест пред конфликтот, беше прекината на 1 март поради оштетување од другата страна на реката Днепар, а обновена е вечерта на 1 јули“, се вели во соопштението на МААЕ.
Понатаму се додава дека активностите за поправка на далноводот се попречени поради тешката безбедносна ситуација во јужна Украина, нагласувајќи дека повторното поврзување на 330-киловолтниот далновод е значајно бидејќи централата се потпира на една главна 750-киловолтна линија.
Нуклеарната централа „Запорожје“, најголема во Европа и една од 10-те најголеми во светот, е под контрола на Русија од март минатата година, веднаш по почетокот на војната во Украина.
Оттогаш е присутен стравот од нуклеарна катастрофа бидејќи и Москва и Киев се обвинуваат меѓусебно за гранатирање во близина на централата.
Извор: www.aa.com.tr
