МОСКВА (АА) – Украина го погоди седиштето на руската Црноморска флота во Севастопол со ракетите „Сторм Шадоу“, кои беа испорачани од Велика Британија, изјави денес портпаролката на руското Министерство за надворешни работи, Марија Захарова, јавува Анадолу.
„Што се однесува до неодамнешните ракетни напади на Кримскиот Полуостров и директно на седиштето на Црноморската флота во Севастопол, за таа цел беа користени британско-француски ракети воздух-земја ‘Сторм Шадоу’ и тие беа доставени од Лондон“, изјави Захарова како одговор на прашањето на Анадолу на прес-конференцијата во Москва.
„Авионите МиГ-29 и Су-24 од руско производство на украинската авијација беа повторно опремени за лансирање ракети од британско-француско производство“, додаде таа.
Украинските сили за специјални операции во понеделникот соопштија дека стојат зад нападот врз поморскиот штаб, тврдејќи дека 34 руски офицери, меѓу кои и Виктор Соколов, командант на флотата, биле убиени во нападот.
Подоцна се докажа дека смртта на командантот е лажна кога тој се појави на руската телевизија неколку часа по украинските тврдења.
Захарова рече дека Москва е свесна за пристигнувањето на тенковите „Абрамс“ од американско производство во Украина, истакнувајќи дека е испорачан „ограничен број“ тенкови од „стара модификација“.
„Според експертите, тоа нема да ја смени ситуацијата во зоната на контакт на вооружените сили на Руската Федерација со вооружените формации на режимот во Киев“, рече таа.
Украинскиот претседател Владимир Зеленски во понеделникот изјави дека американските тенкови „Абрамс“ пристигнале во Украина и се подготвуваат да ги зајакнат нивните бригади.
