МОСКВА (АА) – Пронајдени се остатоците од цивилниот хеликоптер Ми-8, кој исчезна вчера на крајниот исток на полуостровот Камчатка во Русија, во кој се наоѓале 22 лица заедно со членовите на екипажот. Руското Министерство за вонредни ситуации информираше дека се пронајдени телата на 17 лица и дека спасувачите ја продолжуваат потрагата по преостанатите лица што се наоѓале во хеликоптерот, пренесува Анадолу.
„Се претпоставува дека се мртви сите лица што се наоѓале во хеликоптерот“, објави руската државна новинска агенција РИА Новости, цитирајќи го Министерството за вонредни ситуации. Во веста се вели дека хеликоптерот најверојатно се урнал од слаба видливост поради лошите временски услови.
„Од воздух се откриени остатоците од претходно исчезнатиот хеликоптер. Тој се наоѓа на надморска височина од 900 метри во близина на местото каде што последен пат бил контактиран“, објави на Телеграм Министерството за вонредни состојби.
Хеликоптерот Ми-8 полетал во саботата во близина на вулканот Вачкажец во регионот Камчатка, но не стигнал до својата дестинација според планираното, објави претходно руската Федерална агенција за воздушен транспорт.
Во соопштението се наведува дека се верува дека во хеликоптерот имало 19 патници и тројца членови на екипажот.
Извор: Anadolu Agency (AA)
