Русија: Го ослободивме Соледар

Само во последните три дена во Соледар се ликвидирани над 700 украински војници и над 300 единици украинско оружје, додаваат од руското Министерство за одбрана

Руските сили ја презедоа контролата врз Соледар, соопшти денеска Министерството за одбрана на Русија. Портпаролот на руското Министерство за одбрана Игор Конашенков изјави дека Соледар е важен за продолжување на успешните офанзивни операции во насоката Донецк, пренесува Интерфакс.

Русите неодамна објавија дека го зазеле, но Украинците тврдеа дека нивните војници сè уште се во Соледар.

„За време на ослободувањето на Соледар, руските воздухопловни сили уништија три авиони и еден хеликоптер кои ѝ даваа огнена поддршка на украинската армија, додека руската воздушна одбрана во областа на градот собори девет проектили истрелани во правец на окупираните упоришта“,

соопшти Министерството за одбрана на Русија.

За време на ослободувањето на Соледар, единиците на руските воздухопловни сили извршија таен маневар напаѓајќи ги позициите на украинските трупи. Градот беше блокиран од север и југ. Само во последните три дена во Соледар се ликвидирани над 700 украински војници и над 300 единици украинско оружје, додаваат од Министерството.

Според извештаите, ослободувањето на Соледар овозможува да се пресечат патиштата за снабдување на украинските трупи до Артјомовск и да се опколат преостанатите единици.