Португалската суперѕвезда Кристијано Роналдо ја заврши сезоната во Саудиска Арабија на достоен начин.
40-годишниот напаѓач постигна гол во поразот на Ал-Наср од Ал-Фатех со 2-3 на гостински терен и стана најдобар стрелец во саудиската лига со 25 гола. Иван Тони од Ал-Ахли беше втор со 23 реализирани погодоци, додека Карим Бензема (Ал-Итихад) и Абдераза Хамдалах (Ал-Шабаб) постигнаа по 21 гол.
Роналдо сега има 936 гола во својата кариера и точно 800 на клупско ниво со екипите на Спортинг Лисабон, Манчестер Јунајтед, Реал Мадрид, Јувентус и Ал-Наср. Кристијано постигна 136 гола за репрезентацијата на Португалија.
Против Ал-Фатех, петкратниот освојувач на „Златната топка“ го отвори резултатот во 42-та минута. По центаршут од корнер, топката беше додадена кон далечната статива до Роналдо, а тој со глава ја внесе во мрежата.
На крајот од полувремето, Матијас Варгас израмни за домаќините, но Ал-Наср повторно поведе четвртина час пред крајот со голот на Садио Мане. Натпреварот немаше значење за двата тима, кои делуваа доста нефокусирано во одбраната. Мурад Батна го изедначи резултатот на 2:2 во 81-та минута, а во продолжението Матеуш Мачадо му донесе успех на Ал-Фатех.
Ал-Наср заврши на третото место во конечниот пласман и не успеа да обезбеди квота за Азиската Лига на шампиони. Ал-Итихад ја освои титулата, додека минатогодишниот шампион Ал-Хилал заврши втор.
Во последното коло, Ал-Итихад го победи Дамак со 1-0, а голот го постигна холандскиот интернационалец Стивен Бергвајн. Ал-Хилал ја победи Ал-Кадисија со 2-0 со головите на српските ѕвезди Александар Митровиќ и Сергеј Милинковиќ-Савиќ. (МИА)
Извор: kurir.mk
