Во веста на руската агенција се додава дека српските доброволци заедно со борци од Русија учествуваат во сите борбени вежби на еден од полигоните во областа Запорожје за понатамошно учество во специјалната воена операција
Руската новинска агенција РИА Новости вчера објави дека во регионот Запорожје пристигнале првите доброволци од Србија. Тие, како што се додава во веста на руската агенција, ќе започнат борбена обука како дел од доброволниот баталјон „Судоплатов“.
Се додава дека српските доброволци заедно со борци од Русија учествуваат во сите борбени вежби на еден од полигоните во областа Запорожје за понатамошно учество во специјалната воена операција.
„Дојдовме да ги поддржиме руските браќа, како што добро се сеќаваме на настаните што се случија во Југославија во 90-ите. Се сеќаваме на неправдата што ја покажа НАТО кон Србија и ситуацијата во Косово. Затоа, дојдовме да го поддржиме рускиот народ во нивната фер борба. Украина, всушност е оружје во рацете на Западот против Русија“,
изјавил за РИА Новости еден од српските доброволци со ознака „Дунав“.
Вршителот на должноста гувернер на регионот Запорожје, Евгениј Балицки, како што објави ТАСС, потврдил дека Србите кои му се приклучиле на волонтерскиот баталјот „Судоплатов“ почнале да извршуваат борбена обука.
Српскиот министер за одбрана Милош Вучевиќ во понеделникот изјави дека воените и цивилните безбедносни агенции на Србија ги следат и анализираат информациите поврзани со објавените видеа и фотографии на социјалните мрежи на наводни српски борци кои им се приклучиле на руските единици во Украина.
„Во нашата земја е многу јасно дека учеството на српските граѓани во сите конфликти во други земји е забрането, а тоа со себе повлекува правни последици“,
рече тој.
Според кривичниот закон на Србија, за учество во оружени конфликти пропишаната казна затвор е од шест месеци до пет години, а осум години ако делото е направено во рамки на група. За организирање на заминување казната изнесува до десет години затвор.
Извор: 360stepeni.mk
