Антологиски грабеж – вака претседателот на СДСМ, Венко Филипче го оцени Договорот со Велика Британија за шестте милијарди евра за инвестициски проекти.
Пред симпатизери во Штип, Филипче откри дека делегацијата предводена од вицепремиерот Александар Николоски во Лондон веќе се сретнала со фирми што ќе бидат најмени за спроведување на проектите, што било спротивно на владините најави и законите.
„Веднаш после потпишувањето се сретнеале во Лондон со фирмите кои ќе бидат изведувачи на проектите… каков тендер, каков Закон за јавни набавки?! Сè е тоа една голема лага. Ги задолжија следните генерации, правевме пресметка – секое бебе што ќе се роди следните 25 години, на денот на раѓањето ќе биде задолжено шест илјади евра.“, порача Венко Филипче.
Од ВМРО-ДПМНЕ одговорија дека грабеж била набавката на двојно поскапи кинески вакцини, како и модуларната болница во Тетово.
„Она што не е грабеж е кога ќе склучите пакт со најмоќната држава во светот и притоа нема да продадете ниту име, ниту Устав или идентитет. Не е грабеж кога од таквото партнерство ќе извлечете пари за нови железници, за болници, за образование… нешто што е добро и за Македонците и за Албанците.“, вели Валентин Манасиевски.
Додека се уште не е позната каматната стапка за средствата што ќе бидат повлечени, во интервју, британскиот амбасадор Метју Лосон потврди дека еден од условите во Договорот предвидува во проектите што ќе се финансираат со овие пари да учествуваат најмалку 20% фирми од Британија, во било кој дел од процесот. Вицепремиерот Николоски во интервју потенцира дека ќе се почитува Законот за јавни набавки и очекува за две недели Собранието да го ратификува договорот, додека пак на есен да започнат градежните работи за железницата и медицинските установи, со вредност до 2,2 милијарди евра.
ИЗВОР: ТВ 21
