Расте бројот на жртви во Грција: Седум тела извлечени од згмечениот вагон-ресторан

Денеска се очекува да се отстрани вагонот-ресторан, по што спасувачките екипи ќе продолжат да работат на останатите. Операцијата ќе продолжи и утре

Седум јагленосани тела на патници биле утрово извлечени од остатоците од еден од вагоните, со што бројот на загинати во железничката несреќа во Грција се зголеми на 46 лица, соопштија од Противпожарната служба на Грција.

Портпаролот на службата, Василиос Ватракојанис, информираше дека операцијата за пребарување и извлекување на местото на железничката несреќа продолжува и денеска, а во моментов активностите се насочени кон вагонот-ресторан, кој поради јачината на судирот бил згмечен од првиот вагон.

„Се отстранува патничкиот вагон што е врз него, а потоа ќе се отстрани компресираниот вагон-ресторан што е во форма на буквата ’Г‘. Од овој вагон утринава се извлечени вкупно седум јагленосани тела. Потврдениот број на загинати во овој момент е 46“,

рече Ватракојанис.

Toj објасни дека за продолжување на акцијата за пребарување и спасување ќе треба да се пресечат метали со специјални машини и делумно да се отстранат метални елементи и процените се дека конкретниот вагон до пладне ќе се отстрани, а за останатите ќе биде неопходно операцијата да продолжи утре.

Целата операција се води под тешки услови, а повремениот дожд дополнително ја отежнува акцијата.

ПОВРЗАНИ ВЕСТИ:

(ВИДЕО) Безбедносни камери го снимиле судирот меѓу двата воза во Грција

(ВИДЕО) Возовите што се судрија во Грција возеле со брзина од 160 километри на час: Повеќето загинати се млади лица

Грчки медиуми: Свртничарот од Лариса призна вина – го испратил возот по погрешна пруга

(ВИДЕО) Објавен последниот разговор меѓу шефот на станицата и машиновозачот пред судирот на двата воза во Грција