Компанијата „Топлина“ од охридското село Подмоље ќе започне со копање јаглен и меѓуслојна јаловина од рудникот Брод-Гнеотино за потребите на РЕК Битола. Оваа одлука, без објавување на јавен оглас, беше донесена преку преговори “во четири очи” од страна на раководството на Електрани на Северна Македонија (ЕСМ), како што известува „360 степени“.
До пред еден месец оваа компанија беше еден од подизведувачите на „Марковски компани“ за ископ на јаглен и јаловина за потребите на РЕК „Битола“, заедно со уште две фирми со кои беше раскинат претходниот тендер.
Според објавата на Бирото за јавни набавки, склучена е рамковна спогодба со вкупна вредност од околу 1,15 милиони евра. Овој договор е ограничен на шест месеци, што е поразлично од вообичаената практика каде договорите се потпишуваат на една до две години. Вредноста на новиот договор е значително помала во споредба со претходниот договор од 46 милиони евра, кој беше потпишан со фирмата „Марковски компани“.
Минатиот месец, РЕК Битола го раскина договорот со „Марковски компани“, објаснувајќи ја одлуката со „неодговорното постапување“ на фирмата која не ги исполнила своите обврски, што ја загрозило енергетската стабилност на државата.
ИЗВОР: racin.mk
