Диего Симонет е „ракометниот Меси“ на Аргентина, лидер на „гладијаторите“, кои зацртаа цел пласман во главната фаза на 28-то Светско првенство, иако пред стартот на битките во групата со Холандија, Македонија и фаворитот Норвешка, посочува дека не можеле да добијат – потешка група.
Аргентинците во петок отвораат против Холандија, по што им следува дуелот со Норвешка, која во првото коло утревечер од 20.30 часот игра против Македонија, а последниот меч кој може да биде и решавачки е против избраниците на Кирил Лазаров.
„Јас можам да кажам само дека сме во најтешката група. Со Норвешка како ривал и селекција која е кандидат и за титула и со Холандија и Македонија, селекции кои ако не се на највисоко ниво може да загубите, потешко не може. Холандија и Македонија се наша шанса, селекции од кои може да загубите, ама може и да ги победите. И нема лесен ривал, а во оваа група и со една победа може да не одите понатаму. Јасно е дека наша цел е следната фаза“, вели Симонет
Тој има шест континентални титули со Аргентина откако ја води оваа селекција како лидер на теренот, а на последното СП во Египет пред две години „гладијаторите“ беа 11-ти.
„Одиме од меч во меч, прва е Холандија и треба да се сконцентрираме како да ја победиме. Ова е прв меч, не размислуваме за следните ривали и ќе треба да дадеме сѐ од себе. Холанѓаните се на високо ниво со лидер како Лук Стејн. Норвешка е на врвно ниво, Македонија е некако најизрамнета со нас, на наше ниво. Ама, секој меч ќе биде максимално тежок и ќе бара наше најдобро издание ако сакаме да ги оствариме целите“, додава Аргентинецот.
ИЗВОР: kurir.mk
