ИСТАНБУЛ (АА) – Рускиот претседател Владимир Путин изјави дека соработката меѓу Туркије и Русија се одвива успешно во широк спектар области, јавува Анадолу.
„Повеќеслојната соработка меѓу Русија и Туркије, која се заснова врз принципите на добрососедство, партнерство и заемна корист, успешно се развива во сите области“, рече Путин на прес-конференцијата во приморскиот град Сочи со својот турски колега Реџеп Таип Ердоган.
Зборувајќи дека со претседателот Ердоган разговарале за клучни прашања во духот на билатералната соработка, Путин рече дека средбата се одржала во „конструктивна и деловна атмосфера“.
„Разменивме мислења за актуелните теми од меѓународната и регионалната агенда“, истакна Путин.
„Без сомнение, денешните разговори ќе послужат за понатамошен развој на руско-турското партнерство во сите области“, додаде тој.
Путин рече дека тој и Ердоган констатирале континуираниот раст на трговската размена меѓу двете земји, додавајќи дека обемот на трговијата е зголемен за 86 отсто, достигнувајќи рекордни 62 милијарди долари на крајот на 2022 година, што подоцна порасна за уште 4 отсто во првата половина од оваа година.
