Путин обвини дека Западот и Киев сакале Русите да се убиваат едни со други

Во своето обраќање, кое го пренесува Би-би-си, Путин кажа дека највисоката консолидација на општеството, извршната и законодавната власт во Русија била покажана на сите нивоа, а граѓанската солидарност покажала оти секоја уцена или обид за организирање внатрешни немири во Русија се осудени на пропаст

Западот и Украина сакаат Русите да се убиваат едни со други, обвини рускиот претседател Владимир Путин во своето телевизиско обраќање до јавноста откако на 24 јуни руската платеничка воена група „Вагнер“ започна бунт во област недалеку од Москва, кој подоцна заврши со повлекување на војниците.

„Оние кои го организираа ‘бунтот’ сакаа Русија да изгуби, а нашето општество да се удави во крв, но погрешно проценија“,

рече рускиот претседател во обраќањето до јавноста.

Во своето обраќање, кое го пренесува Би-би-си, Путин кажа дека највисоката консолидација на општеството, извршната и законодавната власт во Русија била покажана на сите нивоа, а граѓанската солидарност покажала оти секоја уцена или обид за организирање внатрешни немири во Русија се осудени на пропаст.

Тој им се заблагодари на војниците и на командантите на платеничката група „Вагнер“ оти донеле правилна одлука и го запреле нивниот бунт, притоа не дозволувајќи да дојде до, како што рече, братоубиствено крвопролевање.

„Уште на самиот почеток беа донесени сите неопходни одлуки за неутрализирање на заканата и бунтот во секој случај ќе беше потиснат, но организаторите сфатија дека нивните постапки се криминални“,

рече рускиот претседател.

Додаде дека поголемиот дел од припадницте на „Вагнер“ се руски патриоти и рече дека војниците од оваа платеничка група имаат можност да продолжат да ѝ служат на Русија и да склучат договор Министерството за одбрана или оние кои сакаат, да се преселат во Белорусија.

За време на своето петминутно обраќање, рускиот претседател не го спомна името на основачот на „Вагнер“, Евгениј Пригожин – кој, пак, претходно денеска за првпат се обрати по бунтот во саботата.

• Целта на бунтот не беше соборување на руското раководство, вели шефот на „Вагнер“

Во видеопораката објавена на Телеграм, Пригожин кажа дека целта на бунтот на неговите војници била да се нагласи неспособноста на руското воено законодавство во војната против Украина и да се избегне уништувањето на групата „Вагнер“, а не да се собори руското раководство.