МОСКВА (АА) – Рускиот претседател Владимир Путин денес изрази загриженост за растечката закана од Трета светска војна, посочувајќи ги ескалирачките конфликти во Украина и Блискиот Исток како опасни жаришта, јавува Анадолу
„Сега постои голем потенцијал за конфликт“, рече Путин во говорот на Меѓународниот економски форум во Санкт Петербург. „Загрижени сме за можноста од светска војна. Сите конфликти мора да се решат на мирен начин.“
Тој го критикуваше НАТО за проширување кон исток, велејќи дека Алијансата продолжува да ги занемарува безбедносните интереси на Русија. „Ова е уште еден остаток од неоколонијалната политика на Западот“, изјави тој.
Путин рече дека американскиот претседател Доналд Трамп ветил дека ќе го поддржи барањето на Русија за гарантирање на безбедноста на нејзиниот персонал во иранската нуклеарна постројка Бушер.
Во врска со ситуацијата на Блискиот Исток, Путин ја коментираше заканата на Израел за атентат на ајатолахот Али Хамнеи, врховниот лидер на Иран: „Се надевам дека ова ќе остане само реторика.“
– Путин: Употребата на нуклеарно оружје против Русија би била „последната грешка“ на Киев –
Рускиот претседател ја предупреди Украина дека секоја употреба на нуклеарно оружје против Русија ќе биде нејзина последна грешка.
Путин предупреди дека ако Украина се обиде да фрли таканаречена „валкана бомба“ на руска територија, тоа ќе предизвика реципрочен одговор од Москва.
„Ова би била колосална грешка од страна на оние кои ги нарекуваме неонацисти што оперираат во денешна Украина, можеби нивна последна“, рече тој.
Путин истакна дека нуклеарната доктрина на Русија предвидува строг одговор на егзистенцијалните закани, додавајќи дека последиците за Киев би биле катастрофални.
„Нашиот одговор би бил исклучително суров, катастрофален, и за неонацистичкиот режим и за самата Украина“, рече тој.
Во истовреме, Путин призна дека Русија во моментов нема потврдени докази што укажуваат дека Украина планира да употреби валкана бомба.
„Фала му на Бога, немаме докази за такви намери. Но, работиме под претпоставка дека таква идеја може да се појави во нечиј болен ум“, рече тој.
На прашањето колку далеку Русија има намера да напредува во Украина, Путин рече дека верува оти рускиот и украинскиот народ се еден народ и во оваа смисла, „цела Украина е наша“.
„Каде што стапнува ногата на руски војник – тоа е наше“, рече Путин.
– Путин рече дека Русија можеби нема цел да го освои градот Суми, но не ја исклучи можноста –
Рускиот претседател рече дека руските сили воспоставиле безбедносна зона длабока до 12 километри по должината на украинската граница, наведувајќи ги како оправдување повторените напади од североисточниот украински пограничен регион Суми.
Путин рече дека украинските сили „упаднале во“ рускиот регион Курск и извршиле „злосторства против цивилното население“.
Тој истакна дека како одговор, руските трупи им нанеле „огромни загуби“ и ги протерале напаѓачите, што ја натерало Москва да ја обезбеди пограничната област.
„Сега мора да создадеме безбедносна зона по должината на државната граница, бидејќи тие постојано напаѓаат оттаму со артилерија и беспилотни летала“, рече тој. „Длабочината е од 12 километри, некаде 8, 10, 12 километри. Следен е градот Суми.“
Путин додаде дека иако Русија во моментов нема за цел да го заземе Суми, тој не би го исклучил тоа, и ја обвини Украина дека ја провоцира ситуацијата преку „целосно неписмени, неоправдани дејствија“.
Украинската влада нема одговорено досега на изјавите на Путин.
Во четвртата година од војната, копнените операции на Русија неодамна се интензивираа во североисточна Украина, особено во близина на Харков, додека претставниците на Кремљ продолжуваат да ги толкуваат таквите потези како одбранбен одговор поради украинските напади.
Извор: Anadolu Agency (AA)
