Кандидатот за градоначалник на град Скопје, Орце Ѓорѓиевски, денеска во центарот на градот го најави еден од најголемите инфраструктурни проекти – изградбата на првата подземна сообраќајница под комплексот „Лимак“, како дел од првата фаза на булевар „Македонија“.
„Овој проект не е само дел од мојата програма, туку вистински пресврт за централното градско подрачје. Се работи за клучен проект што ќе го растовари метежот во центарот на Скопје,“ изјави Ѓорѓиевски.
Новата подземна сообраќајница ќе има шест ленти – четири за двосмерен автомобилски сообраќај и две за автобуси, со дополнителни тротоари за пешаци. Според него, ова решение ќе овозможи непречено одвивање на сообраќајот и значително растоварување на центарот на градот.
Проектот предвидува и изградба на нов кружен тек кај „Нова Македонија“, како и уште два кружни тека кај булевар „Кочо Рацин“ и улица „Железничка“. Ѓорѓиевски најави дека овие решенија ќе донесат побезбеден проток и „паметни сообраќајни решенија според европските стандарди“.
Тој истакна дека во рамките на истиот проект ќе се работи и на трансформација на улицата „Даме Груев“ во булевар, со што, како што рече, ќе се постигне целосно ослободување од метежот во центарот.
„Иако постојат предизвици со зградата на ‘Макотекс’, имаме јасен план за правно и техничко решение,“ рече Ѓорѓиевски, додавајќи дека централното градско подрачје ќе добие современ, урбан и проточен изглед.
Во однос на проблемот со паркирањето, тој најави изградба на катна гаража од европски тип во Буњаковец, како и поставување монтажни паркинзи во Капиштец и Под Кале.
„Со овие решенија значително ќе го подобриме квалитетот на живот во градот и ќе овозможиме поудобен пристап до паркинг за скопјани,“ порача Ѓорѓиевски.
