Родителите на децата кои трагично ги загубија животите во пожарот во дискотеката во Кочани, за прв пат маршираа и низ Скопје. Дел од нив беа повикани и на средба со државниот јавен обвинител.
„Одговарајќи на сите поставени прашања и дилеми на блиските на починатите, обвинителите ги уверија дека истрагата е сеопфатна и се земаат предвид сите аспекти на евентуална одговорност за трагичниот настан. На семејствата им беше најавена и динамиката на претстојни распити на оштетените како следна фаза од истражниот процес“, вели ЈО.
Маршот продолжи пред Собранието. Неколку пратеници додека траеше редовната пауза за ручек, им се придружија на демонстрантите велејќи дека ја разбираат нивната болка.
„Со неговата добрина и ангелско лице гледаше да спаси многу животи, но за жал неговиот не. Затоа што беа оставени сами на себе да се борат и да се спасуваат едни со други. Тој беше толку многу хуман што не можел да ги остави своите другари да загинат“, вели родител.
Марширајќи стигнаа до Министерството за внатрешни работи.
„Правда од овој случај мора да има, ако сакаме да имаме нормална држава. Овие деца ако сакаме да имаме нормална држава никогаш не треба да бидат заборавени“, вели Панче Тошковски.
На денешниот протестен марш поддршка даде и поранешната шефица на Обвинителството за гонење на организиран криминал и корупција Вилма Русковска.
ИЗВОР: ТВ 21
