Хрватската „НоваТВ“ вечерва објави неофицијални информации според кои грчката полиција пронашла отпечатоци од убиецот на 29-годишниот навивач на грчкиот клуб АЕК и дека тие се на грчки државјанин.
Сомнежите се дека во синоќешните немири во Атина, предизвикани од навивачи на хрватскиот клуб Динамо Загреб, учествувале и навивачи на грчкиот клуб Панатинаикос кои се ривали со АЕК, па можно е убиецот да се бара меѓу нив. Но ова се непотврдени информации.
Инаку, како што јави „НоваТВ“, во текот на целиот ден, грчката полиција апси хрватски навивачи барајќи ги по хотелите и другите сместувачки капацитети во грчкиот главен град.
Грчката полиција привела 19-годишен Хрват осомничен дека учествувал во хаосот во Атина на грчкиот граничен премин Какавија кон Албанија. Наводно, младиот човек се обидел да избега од државата со автобус.
Хрватски навивачи, фанови на Динамо Загреб, кои биле учесници во хулиганскиот судир во Атина, денеска се обиделе да избегаат и преку Македонија. Едно комби возило со седуммина навивачи е сопрено на граничниот премин Евзони кон С Македонија, а во него биле пронајдени палки и ножеви. Навивачите се приведени.
Хрватската „НоваТВ“ претходно објави дека грчката полиција знаела дека во земјата доаѓаат хрватски навивачи. Се одлучила за т.н. дискретна придружба. Со свои возила ги следела навивачите се до Атина. Но таму, во милионскиот град, навивачите на Динамо Загреб, свесни дека ги следат, се разделиле и се упатиле во различни правци, а полицијата се изгубила незнаејќи кого да следи. Потоа, Хрватите се паркирале во некој парк, формирале група и го предизвикале синоќешниот инцидент во кој загина еден грчки навивач, друг се бори за живот, а најмалку уште десет лица беа повредени. Полицијата уапси 96 лица, меѓу кои 82 Хрвати. Потрагата по други учесници во немирите трае цел ден.
Извор: 360stepeni.mk
